Muzafferus mənim üçün hər şeyin adıdır: kitablarımın müəllifi, Play Market-də developer adım, github username-im, sosial hesablarım. Məndən ad soruşulan hər yerə Muzafferus yazıram.
Yaratdığım hər şeyin üstündə eyni ad var: Muzafferus. Şeir kitabına da, yazdığım tətbiqə də, podcasta da. Çünki mənim üçün şairlə mühəndis iki ayrı adam deyil — eyni adamın eyni işi: görünməyən bir boşluğu görünən, eşidilən etmək.
1995-ci ildə Kür çayının sahilində, Yevlaxda doğuldum; indi Bakıda yaşayıram. Uşaqlığımın bir parçası Sumqayıtda, bir liseydə keçdi — təfəkkürümü formalaşdıran yerlərdən biri. Sonra Azərbaycan Dövlət Neft Akademiyasını (indiki ADNSU) bitirdim, Step IT Academy-də oxudum və proqram təminatına keçdim. Amma yazmaq həmişə yanımda idi — əvvəl şeir, sonra elmi-fantastika.
Üç kitabım çap olundu: Şizofrenik Saturn, Nar dənələri və M-66 — sonuncunun çoxunu hərbi xidmətdə yazdım. Hər üçü eyni şeyin ətrafında dövr edir: boşluq, qaranlıqla işığın oyunu, kiçik «mən»in kosmik miqyas qarşısında dayanması. 2010–2016 mənim ən melanxolik, eyni zamanda ən məhsuldar illərim idi; kədər ilham idi.
Səs də mənim dillərimdən biri oldu: «Axtaran Adam»dan «Gec oldu»ya qədər podkastlar yazdım. Bu gün Mənsurə ilə «LineOfUs» adı altında «Yolda olarkən»i qururuq — Batumidən Misirə, Portuqaliyaya... öyrənə-öyrənə, yola çıxa-çıxa yaşadığımız bir həyat.
Bilirəm ki, rahatlıq da bir tələ ola bilər. Ona görə qurmağı dayandırmıram — onlarla tətbiq, oyunlar, startaplar və hələ bitməmiş dördüncü kitabım «Boş Çoxluq». Bunların heç biri ayrı işlər deyil; hamısı eyni boşluğa qarşı.
Bu sayt illərdir səpələnmiş hər şeyi ilk dəfə bir yerə yığmaq cəhdimdir. Sona çatmış bir arxiv deyil — açılmamış növbəti qapı.
Derek Sivers-in «now page» ideyası ilə: bu gün, 2026-da, diqqətimin harada olduğu.
E-poçt ən qısa yoldur. Qonaq dəftərinə bir sətir də qoya bilərsən.